PAPER-ZORROA

Joseba Olagarai da nire izena. Kazetaritzan lizentziatua, Haur Hezkuntza ikasten hasi nintzen duela hiru urte. Gustatzen zait hezkuntza-mundua eta gustuko ditut haurrak. Hezkuntza ez-formalean urte frankoz egin dut lan eta eskola-mundua barrenetik ezagutzeko, HH ikasten hasi nintzen.

Konturatu orduko pasatu zaizkit hiru urte. Fakultateko ikasketek ez naute erabat bete. Hala ere, lanerako formula dexente eta hausnarketarako pista franko jaso ditut.

Blog honetan Josemi Correaren ikasgaiko lanak bildu ditut. Talde-lanean aritu gara: Nerea Ugarte, Maier Irazusta, Iker Urkiola, Jexux Buldain, Ander Errasti eta ni, Joseba Olagarai. Hala ere, bakoitzak bere bloga egin dugu.

Jarraian ikasgaiaren laburpen gisako bat eginen dut.

Joan den martxoan hasi ginen. Hasiera ez zen erraza izan. Ikasgai "atipiko" samarra denez, martxa hartzea dexente kostatu zitzaigun.

Hasteko, hainbat ikastetxetako IKTen konparaketa egin genuen. Lan mardula izan zen. Praktiketan egon ginen ikastetxeetara bisita egin genuen (aunitz gustatu zitzaidan Langile Ikastolara bueltatzea!), informazio jaso, guztia elkartu, osatu eta lan txukuna osatu genuen. Oiartzungo Haurtzaro Ikastolan, Legazpiko Domingo Agirren, Leitzako Erletan, Orioko Herri Ikastolan eta Hernaniko Langile Ikastolan burutu genuen lana. Eneritz Mitxelena oiartzuarrak gurekin parte hartu zuen lan honetan.

Bat eta huts.

Hurrengo lana manifestua egitea izan zen. Ikaragarri gozatu nuen lan honekin. Hiru ikasturte hauetan unibertsitatean irakatsi digutenarekin eta ikasi dugunarekin hausnarketa kritikoa egin genuen. Gauza aunitz ateri ziren. Ander Errasti eta Nerea Ugarterekin egin nuen lana. Primeran moldatu ginen. Aunitz ezagutzen dugu elkar eta hagitz gustura egin genuen lan. Lan mardula ta osatua sortu genuen. Irakaskuntzaz, irakasle idealaz, guk sinesten dugun heziketaz... hezkuntzarekin lotura duen edozeini interesatu dakiokeen lana egin genuen.

Bi eta huts.

Hurrengo lana: murala. Gozamena izan zen. Orion elkartu ginen taldekideak argazki-sesio bat egiteko. Sekulako argazki-estudioa prestatu genuen Beñat Solaberrieta klasekidearen laguntzaz. Irudi baten bidez egin genuen murala. Ideia aunitz adierazi genituen eta hormairudi originala egin genuen. Hagitz ongi pasatu genuen argazkiak ateratzen. Mozorrotu ginen, elkar margotu, irri egin... gozamen hutsa izan zen.

Lan hauek guztiak egiten ari ginen bitartean, Josemi Correa irakasleak jarraipena hurbiletik egin zigun eta tutoretzen bidez, bide onetik gindoazela ziurtatzen zigun. Aunitz animatzen gintuen eta bulkada garrantzitsuak ematen zizkigun antzinera segitzeko.

Ikasgaiaren azkeneko txanpan, klaseko aurkezpena prestatu genuen, ordura arte egindakoa hitzaldi motz batean laburbiltzeko asmoz. PREZI programaren bidez bideo-emanaldi berezia sortu genuen. Lan mardula eta txukuna. Nerea Ugarte izan zen klasekideen antzinean aurkezpena egiteaz arduratu zena eta hagitz ongi egin zuen. Zorionak! Ordezkari bikaina izan zinen!

Talde-lana eta giroa ezinhobeak zirenez, bideoarekin ez aski eta, abesti bat ere grabatu genuen. Pirritx eta Porrotxen "irrien lagunak" abesti ezagunaren bertsio bat eginez, "Ziski eta Diskiren lagunak" abestia eta bideoklipa asmatu genituen. Zoramen hutsa izan zen eta lan zoragarria.

Orain Lugaritz Kultur Aretoan dago erakusketa ikusgai. Animatu eta bisitatu!

Ikasgai honetatik gauza franko nabarmenduko nituzke. Alde batetik, talde-lanean hagitz gustura aritu garela. Ekipo ona osatu dugu eta erraz egin ditugu lanak. Gozamena izan da. Bertzalde, hausnarketarako aukera haundiak eskaini dizkigu eta aunitz gustatu zait, hiru urtez ikasi duguna laburbiltzeko modu ezinhobea izan baita. Irakaslearen rola hagitz ona izan da, ondoan egon da beti eta behar izan dugunetan aunitz lagundu digu.

Balorazioa, bikain.

Lugaritzeko erakusketa

Ikasgai honetan egin ditugun lan guztiekin Lugaritz Kultur Aretoan erakusketa paratu dugu.

Interesgarria, desberdina eta koloretsua da. Erakusketaren aurkezpen gisa, Estitxu Aberasturi irakaslearen hitzak bildu ditut:

Narratibak Hezkuntzan:

Hezkuntzari so egiten dion begirada berpentsatzearren, Lugaritz Kultur Etxean, ikus eta arte istorio batzuen erakusketa aurkezten da maiatza osoan zehar. Proiektu honek, irakaslearen prestakuntzan garatzen ari den lana eta bere hedapena beste esparru batzuekin lotzen ditu.

Erakusketaren abiapuntua ikaskuntza-irakaskuntza eszenatokiak zabaltzea da, unibertsitatea eta komunitatearen arteko kolaborazioaren bidez bisitariari ikaskuntzarako beste alternatibak imajinatzeko aukera eskainiz.

Donostiako Magisteritza Eskolatik eta etorkizuneko irakasleen formatzaile bezala, hezkuntza konpromiso sozial bezala ulertzen dugu. Konpromiso honek zabaltzera behartzen gaitu eta aldi berean besteak gugana hurbiltzea. Unibertsitatean hezten dugu, bai, baina unibertsitatea esperimentazio zentru bezala ulertuz.

Egitaraua:

Maiatzak 5 (osteguna): 16:00-19:00, Jardunaldi-ilustrazio tailerra. Myriam Cameros Sierra, “La cenicienta que no quería comer perdices”. Bete arte. Donostiako Magisteritza Eskolako (EHU/UPV) 0.4 gelan.

Maiatzak 5 (osteguna): 19:30tan erakusketaren inaugurazioa. Lugaritz Kultur Etxea, Antigua Auzoa, Donostia.

Maiatzak 20 (ostirala): 10:00-12:30. Haurrentzako tailerrak: Musika eta plastika. Donostiako Magisteritza Eskolako ikasleak (EHU/UPV) - auzoko Ikastetxeak. Erakusketa aretoan.

Maiatzak 27 (ostirala): 18:00-20:00. MercaTRUKE: Zer eskaintzen didazu eta zer eraman nahi duzu? Erakusketa aretoan.

Murala

Mural A

Manifestua

Hementxe duzue Nereak, Anderrek eta nik egin dugun manifestua.

Manifestua_lana_2011

Klaseko aurkezpena

aurkezpena 2 on Prezi

Balorazioa, bikain

Gaur Josemirekin tutoretza izan dugu. Ikasgai honetan nola sentitu garen galdetu digu, zer gustatu zaigun eta zer aldatuko genukeen, zerbait soberan ikusi dugun edota proposamen berririk bagenuen... solasaldi interesgarria izan da.

Guk gure buruari kalifikazioa paratzeko eskatu digu eta taldekide guztiak ados ginen "BIKAIN" dela lortu dugun nota. Inplikatu gara, gozatu dugu, ordu pila bat sartu dugu, hausnartu dugu, eztabaidatu dugu, IKTak erabiltzen ikasi dugu, elkarlanean jardun dugu, lan indibiduala zein taldekoa txukun egin dugu, klase orduetatik kanpo kasik egunero gelditu gara unibertsitatean ikasgai honetako lanak egiteko, gustatu zaigu egindako lana, emaitza orijinala eta ona lortu dugu eta, batez ere, ikaragarri ongi pasatu dugu.

Pertsonalki ez zait ikasgai honen kalifikazioa inporta. Bidean gozatzea izan da inportanteena. Programa berriak erabiltzen ikasi dut, bloga nire eguneroko bihurtu dut, klasekideekin harremana oraindik gehiago hobetu dut, momentu onak pasatu ditugu, irri egin dugu... ezin dut gehiago eskatu!

Ander eta Nerearekin hagitz ongi konpondu naiz, bai manifestua egiten, bai bertzelako lanetan. Gainontzekoekin ere, talde haundian, primeran moldatu naiz, Ikerrekin, Jexuxekin, Maierrekin, Eneritzekin.... Hiru urte dira elkar ezagutzen dugula eta nabaritzen da.

Lan aunitz egin dugu eta ongi. Karrerari akabila borobila emateko modurik hoberena izan da.

Gustatu zait hiru urte hauetan ikasi dugun guztiarekin hausnarketa egitea eta gogoetak manifestuan eta muralean modu artistikoan irudikatzea. Sormen lanak beti interes haundia piztu didate eta ikasgai honek aunitz ase nau zentzu horretan. Josemik bide irekia utzi digu hasieratik, gainean egon da behar genueenan laguntza eskainiz, baina gure esku utzi du lanaren antolamendua. Aunitz gustatu zait hori. Irakasle gisa hagitz rol ona jokatu du.

Eta orain erakusketa!

Dagoeneko montatu dute, Lugaritzen. Oraindik ez dut ikusteko aukerarik izan eta gogo haundia dut. Gainera, Estitxuk erran dit nire lehengo urteko plastikako bideoa hor paratuko duela.

Ilusio berezia egiten dit horrek, lan hura hagitz berezia izan zelako niretzat.

Balorazio ezinhobea egiten diot ikasgaiari. Gauza berri aunitz ikasi ditut eta modu entretenigarrian pasatu ditugu azken hilabeteak. Ezin gehiago eskatu!

Iker, Jexux, Nerea, Maier eta Ander, pazerra izan da zuekin lan egitea!

AUPA GOMETXEROAK!

Ziski eta Diskiren lagunak gara gu!

Pirritxek eta Porrotxek irrien lagunak direla erraten dute...


...ba gu Ziski eta Diskiren lagunak gara!

"Irrien lagunak" abesti ezaguna hartuta, gure bertsioa sortu dugu. Bideoklipa eta guzti egin dugu!

Egun aldrebesa baldin baduzu eta aurpegia alaitu nahi baduzu, hauxe da zure aukera!

Umore handiko abestia aditu eta ikusiko duzu.

Egin klik hemen azpian eta gozatu!

ZISKI ETA DISKIREN LAGUNAK GARA GU!

Hausnarketa kritikoa, haurrentzako ipuin multimedian

Hainbat eskoletan IKTak nola erabiltzen dituzten aztertu ondotik, haurrentzako ipuin multimedia baten bidez aurkezpena egitea pentsatu dugu.

IKTen inguruko ikuspuntu kritikoa modu arin eta entretenigarrian eman nahi izan dugu eta zer hoberik istorio goxo bat asmatzea baino!

Hala ere, itxuraz arina dirudien istorioak kritika sakona gordetzen du gibelean!

Ziski eta Diski dira gure protagonistak eta haien abenturak eta kalenturak ikusiko dituzu hemen azpian klik egiten baduzu:

ZISKI ETA DISKIREN ABENTURAK


Gozatu!

IKASTETXEETAKO IKTEN AZTERKETA

Muralaren aurrerapen ttikia

Oraindik ez dugu murala osatu. Argazkiak ateri ditugu baina fotoshopekin muntaia egin behar dugu. Edozein moduz, Orioko argazki-sesioko ale batzuk hemen paratuko ditut, aurrerapen gisa.

Ideia desberdinak landu genituen sesioan; posturak, osaketak, arropak... retokerik gabeko argazkiak dira hauek. Ateri bezala paratuak. Hala ere, muralaren ideia bat egiteko nahikoak dira. Emaitza franko desberdina izanen da baina argazki hauetako batean oinarritua egonen da.

Lehenago ere erran dudan moduan, gozamena izan zen argazki-sesio hau egitea. Beñat Solaberrietari eskerrak ematen dizkiogu lerro hauen bidez.

Argazkilari bikaina haiz!

Talde osoari ere eskerrak eman nahi dizkiot hagitz gustura egondu ginelako. Aunitz gozatu genuen eta giro onean egin genuen lan.

Aupa GometxEROAK!

Tutoretza, bertze bulkada bat azkeneko espringean

Euskal Herriko itzuliko txirrindularien pare, gu ere bagoaz antzinera, tandema hartuta ziztu bizian!

Gutti falta da Aste Santuko oporrak hartzeko. Ordurako lan guztiak entregatu behar ditugu eta erlojupekoak antzinera segitzen du.

Tik-tak-tik-tak...

Josemirekin bertze tutoretza bat izan dugu. Taldekide berria ezagutzeko aukera izan du, Maier Irazusta, eta Bolivian bizitu dituen gora-beherak konpartitzeko aukera izan dugu denok. Han ikusitakoaren gainean solastu da Maier eta zer pentsatua eman digu denoi.

Lanean nola goazen azaldu diogu Josemiri. Manifestua akabatzeko punttuan dugula erran diogu eta murala ere berdin. Animatuta ikusten gaituela aitortu digu eta pozten dela gure jarrera gogotsuaz.

Guk ere estimatu dugu bere jarrera irekia. Motibatu gaitu eta azken txanparako bulkada polita eman digu.



Ez da aunitz gelditzen. Hurrengo astean hartuko ditugu Aste Santuko oporrak eta bueltan IKTen konparaketen lanaren aurkezpena egin behar dugu klasean. Lugaritzeko erakusketa osatu eta ikustera joateko aukera ere izanen dugu. Gogo haundia dugu. Orain PREZIrekin borrokan gabiltza eta programa nola erabiltzen ikasten. Aurkezpena programa horrekin eginen dugu.

Azkeneko txanpan sartu berri, ilusioz segitzen dugu lanean. Josemik jarrera interesduna eta positiboa agertzen du gurekin. Muraleko argazkiak erakutsi dizkiogu eta aunitz gustatu zaizkiola erran digu. Manifestuari ere itxura ona hartu dio. Bide onetik goazela eman digu jakitera.

Lehenbiziko egunetik hagitz motibatuta hartu dugu ikasgaia eta irakasleak ere sumatzen du jarrera hori.

Aunitz ari gara ikasten eta gainera gustura. Ezin gehiago eskatu!

Orioko argazki-sesioa

Gaur goizean Orion izan gara. Murala egiteko aitzakian, lagun baten lokala argazki-estudio bihurtu dugu. Tela beltz batekin dekoratua montatu dugu, foko haundi batzuk lortu ditugu (ETBko Hitzetik Hortzera programakoak) moketa paratu dugu lurrean... guztia prest argazkia ateratzeko!

Helburua irakaslearen identitateaz eta ikasleen hezkuntzaz hausnarketa sakona egitea da. Hausnarketa hori modu original eta dibertigarrian erakutsi nahi dugu. Horretarako, metafora sakonak erabili ditugu. Sei pertsonaje sortu ditugu eta pertsonaje bakoitzak ideia bat adieraziko du. Horrelaxe osatuko dugu murala.

Goizean goiz, argia hasi orduko, Orion bildu gara sei taldekideak. Dekoratua aste hondarretik montatuta utzia genuen eta gaurko lana argazkia ateratzea izan da. Beñat Solaberrieta klasekide eta laguna izan da argazkilaria.

Irri artean momentu goxoak pasatu ditugu. Argazki hauetan prestakuntza lanak ikus daitezke. Elkar margotu dugu, mozorroak trukatu ditugu, ideia berriak eman dizkiogu elkarri... talde-lanean aritu gara. Aunitz gozatu dugu guztiok.

Ez da lehenbiziko aldia gisa honetako lana egiten dugula. Joan den urtean Estitxu Aberasturirekin plastika ikasgaian Mikel Laboaren lehiaketarako lana egin genuenean sormen-lan bitxia bururatu zitzaigun eta Etxalarren ateri genuen argazkia, nire baserrian, body-paint eginez. Ikaragarri gozatu genuen eta aurten ere horrelako esperientzia ona errepikatzea pentsatu dugu.

Erran eta egin.

Ideia egokia izateaz gain, dibertigarria izatea kontutan hartu dugu eta lortu ere lortu dugu. Aunitz disfrutatu dugu argazki-sesioan. Gozamena izan da. Bai prestakuntza-lanetan, bai argazki-sesioan hagitz momentu onak pasatu ditugu. Emaitza edozein dela ere, bidean gozatu izanak balio haundia du. Eta hori behintzat lortu dugu.

Guk uste genuen muralak koxkorra izan behar zuela tamainaz. Mural bat, alegia. Hala ere, Estitxu Aberasturi irakasleak erran zigun orrialde baten tamainakoa egin behar genuela. Desilusio ttiki bat hartu genuen, gure asmoa argazkia kalitate haundian ateri eta paretean paratzeko moduko kartel koxkorra egitea zelako. Reflex digitala erabili dugu horretarako, argazkiak kalitaterik handienean ateraz. Saiatuko gara gure murala tamaina haundixeagoan egiten. Gustatuko litzaiguke. Ea erakusketan txoko ttiki bat uzten diguten.

Hala ere, oraindik murala osatu beharra dugu. Momentuz argazkia egin dugu baina orain fotoshopean montaje polita egin nahi dugu. Hitzak sartuko dizkiogu, argazkiari zentzu zehatza eman... lana badaukagu. Hala ere, aurreratu samar dugu guztia.

Goiko argazkia atera ditugun zientoka argazkietako bat da. Ez da muralekoa izanen.

Kontent nago. Unibertsitateko lanak egitea ez da beti gustuko gauza izaten eta gaurkoa gozamen hutsa izan da. Bada zerbait!

Manifestua lixto!

Akabatu dugu manifestua. Sekulako lana egin dugu.

Joan den astean egunero-egunero unibertsitatean egon ginen. Ordu aunitz sartu genituen. Gustura aritu ginen lanean, motibazioz eta giro onean.

Emaitzak argi eta garbi erakusten du eskainitako dedikazioa.

Gustura gelditu gara. Lan mamitsua egin dugu, hausnarketa aunitzekoa. Formatu polita eman diogu eta diseinua dexente landu dugu.

Estitxuk eskatu zigunari segituz, orain bigarren bertsioa eginen dugu, ideiak laburbilduz. Orain egin dugun manifesetuak 69 orrialde ditu (montajea eginda 34 orrialde ingurutan geldituko da). Baina Estitxuk Lugaritzeko Erakusketarako lan motzago bat egiteko eskatu zigun. Bere asmoa talde bakoitzak irakaslearen nortasunaz eta hezkuntzaz dituen hiruzpalau ideia ateratzea da, guztiak batuta manifestu komun bat egiteko. Horixe eginen dugu. Momentuz, 17 ideia desberdinetan osatu dugu gure lana. Hortik batzuk aterako ditugu Estitxuri emateko.

Gustura gaude egindakoaz.

Goiko argazkian gaude hitu taldekideak: Nerea Ugarte, Ander Errasti eta Joseba Olagarai.

Plazerra izan da zuekin lan egitea!

GometxEROAK!

GometxEROAK + Beñat (buruan antiojoak dituen guapisimoa)

Oraindik ez genuen taldeko argazkirik publikatu... eta bazen garaia!


Ezkerrean goian Jexux Buldain, bere eskuinean Nerea Ugarte, eskuinerago Beñat Solaberrieta (ikasgai hau konbalitatua izateagatik taldean ofizialki ez badago ere taldekide sentitzen duguna) bere azpian ni, Joseba Olagarai, nire azpian Ander Errasti eta bere ezkerretara Iker Urkiola.

Nabaritzen ahal denez, sekulako eguzkia egiten zuen argazkia ateri dugunean. Bai, Ander, bai, ez da zure aurpegitik hoberena. Hurrenguan guapoago agertuko zara balleteko dantzari jantzita!

Zer gozamena egun hauetako eguraldia. Gezurra ematen du apirilean gaudela! Galtza motxetan eta txankletekin gaur klasera! Hola bai!

Lehenago erran bezala, manifestua talde ttikitan egiten ari bagara ere, murala elkarrekin eginen dugu, argazkiko guztiok eta Maierrek. Beñatek ere lagunduko digu. Hurrengo astean publikatuko dut argazkiren bat. Sekulakoak izanen dira seguro!

Aupa ekipoooooooooo!!!!!!

Hezkuntzaren helburua, zoriontsu izatea

Akabatu dugu manifestua. Azkeneko formatu-detaileak ematea falta zaigu baina mamia egina dago. Kasik 70 orrialdeko manifestua idatzi dugu, inprimituta 20 bat orrialde geldituko dena.

Hezkuntzaren eta irakasle nortasunaren inguruko hausnarketa sakona egin dugu.

-Zer nolako umeak hazi nahi ditugu?

-Nolako irakasleak behar ditugu horretako?

-Zergatik ez du funtzionatzen egungo hezkuntza-sistemak? Zeintzuk dira arazoak?

-Zein proposamen egin daiteke ikasleak hobeto hezteko? Zer da hobeto heztea?

Galdera horiek eta bertze aunitz erantzun ditugu manifestuan. Gogoetan eta esperientzia pertsonalean oinarritutako hausnarketak dira, irakurtzeko, pentsatzeko eta gozatzeko.

Nahi duzu aurrerapen ttiki bat?

Bertzeak bertze, gure ustez, hezkuntzaren helburua zein den erratera ausartu gara.

Badakizu zein den?

Zoriontsu izatea. Horixe bilatu behar dute gure ustez umeek ttiki-ttikitatik. Ez dugu konpetentzietan sinesten, zein baino zein hobeagoa izatean. Zoriontasun indibidualean sinesten dugu, ume bakoitzak bere burua ezagutu eta kontentu bizitzeko egin beharreko lan luzean. Horrela bakarrik izan dezake zentzua irakasleon lanak gure ustez.

Dantzatzea, abestea, margolanak sortzea, antzerkia egitea... haurrek balore garrantzitsuak ikasten dituzte langintza horietan eta bakoitzak bere burua ezagutzeko aukera ezinhobea izaten du. Taldekideekiko harremanak, beldur pertsonalak, blokeo emozionalak… guztiarekin aurrez aurre topo egiten dute eta aunitz ikasten dute horiei irtenbidea topatzeko bidean. Plazerarekin konektatzen dute eta hori hagitz garrantzitsua da gaur egungo eskolan, ematen duelako eskolak ez duela plazerarekin zerikusirik.

Eskola sakrifizioaren eta esfortzuaren topalekua da, zoritxarrez. Gure ustez eskola plazera da, gozamen hutsa. Lagunak egin, emozioekin esperimentatu, harremanak landu… zer gehiago eskatu daiteke! Helburu hori sentiarazi nahiko genieke haurrei egunero.

Manifestuaren zati ttiki bat bertzerik ez da. Lugaritzeko erakusketara gonbidatzen zaituztegu manifestua osorik ikusteko!

Pailazoak, dantzariak, mimoak...

Mural desberdina izanen da.

Originala

Deigarria

Dibertigarria

Sakona

Zer pentsatua emanen duena

Kritikoa

Eta horretarako hainbat pertsonaia erabiliko ditugu: mimoa, balleteko dantzaria, ikasle supergaitua, ikerlaria, pailazo irribartsua, etab.

Horiek guztiak eta gehiago izanen dira gure muraleko protagonistak.

Gaur zehaztu dugu nola egin. Sei lagunen artean eginen dugu: Iker Urkiola, Jexux Buldain, Nerea Ugarte, Ander Errasti, Joseba Olagarai... eta taldekide berri bat gehitu zaigu, Boliviatik etorri berri, Maier Irazusta.

Ongi etorri aspaldiko!

Orion borobilduko dugu egunotan egin dugun lana. Heldu den astearte goizean egin dugu hitzordua eta makineria guztia martxan dugu dagoeneko.

Fokoak, makilajea, arropak, kamara... guztia prest!

Hagitz motibatuta gaude eta lan polita eginen dugu. Ez dut gehiago aintzintuko. Hurrengo posteotan emanen dugu azalpen gehiago.

GORA
GOMETXEROAK!

Motibazioa eta talde-lana

Gogoz eta ilusioz, sekulako abiaduran ari gara lanean. Manifestuaren ideia joan den astean paratu genuen martxan eta ordu aunitzeko lanaren ondotik, lan erdiak egin ditugu dagoenekoz.

Nerea Ugarte, Ander Errasti eta hiruok ari gara lanean. Talde-lan ederra egiten ari gara. Giro onean, dedikazio haundiz eta hagitz motibatuta, manifestu mundiala osatu dugu, nahiz eta oraindik ez dugun akabatu.

Hitzak, hausnarketak, irudiak, komikiak, kolax-montajeak... hiru urte hauetan Unibertsitatean irakasle-identitateaz sortu zaizkigun gogoetak bilduko ditu gure manifestuak. Nolako hezkuntzan sinesten dugu? Nolakoa izan behar du irakasle idealak? Zein dira egungo hezkuntza-sistemaren akatsik handienak? Zergatik dago eskola-porrota?

Galdera horiek guztiak eta bertze aunitz erantzunen ditugu manifestuan.

Kasu praktikoak sartuko ditugu, gure praktika aldietan ikusi ditugunak. Ekarpen teorikoen inguruan ere idatzi dugu, Summerhilleko eskolaz, bertzeak bertze. Nolako irakasleak izan nahi dugun, egungo eskola-sisteman zer aldatu nahiko genukeen... hausnarketa sakonak eta zer pentsatu haundia ematen dutenak sartu ditugu manifestuan. Irakaskuntza ikuspuntu kritikotik aztertuko dugu, irakurleak gustura eta autokritika eginez irakurri dezan.

Itxura eta formatuari garrantzia haundia emanen diogu. Koloreetako orriekin eta diseinu originalarekin sortuko dugu manifestua.

Oraindik akabatu ez badugu ere, lan txukuna eginen dugun ziurtasuna dut. Gogoz eta motibatuta lan egiteak emaitza onak ematen ditu beti.


Tonucci komikigile ezagunaren irudiak erabiliko ditugu lanean, irakaskuntza ikuspuntu kritikotik baloratzen aunitz laguntzen dutelako. Orri honetakoak dira adibideetako batzuk.

Bat eta huts, baguzi antzinera!

Lixto!

Ailegatu gara helmugara.

Ederki kostata, baina akabatu dugu IKTen konparaketaren lana.

Lan txukuna ateri zaigu. Sei eskoletako IKTak konparatu ditugu; Leitzako Erleta eskolakoak, Orioko Ikastolakoak, Legazpiko Domingo Aguirrekoak, Oiartzungo Haurtzarokoak eta Hernaniko Langile Ikastolakoak. Taulak osatu ditugu, konparaketa zehatzak egin, ondorioak ateri, gure iritzia eman... uste baino lan mardulagoa eta osatuagoa egin dugu. Ez da erraxa izan baina merezi izan du. Emaitza hagitz ona da.

Bat eta huts.

Hurrengo lana manifestua da. Talde ttikitan banatuko gara, lana erraxago egite aldera. Jexuxek eta Ikerrek elkarrekin eginen dute manifestua eta Nereak, Anderrek eta nik osatuko dugu bertze taldea.

Hasteko, ideia-zaparrada egin dugu lana nola egin erabakitzeko. Egitasmo originalak ateri zaizkigu. Hiru urte hauetan Magisteritza Eskolan ikasi duguna modu desberdin batean adierazi nahi dugu. Solasaldi interesgarria izan dugu Nereak, Anderrek eta hiruok. Gauza aunitz izan ditugu hizpide eta ideia batzuk nabarmendu ditugu, manifestuan paratuko ditugunak, oraindik zehaztu ez dugun formatua erabiliz.

Bertzeak bertze guk sinesten dugun hezkuntza-sistemaren aldeko manifestua eginen dugu. Zer nola hazi eta hezi nahi ditugun umeak irakasle bezala aldarrikatuko dugu manifestuan. Hauexek izanen dira gure ideia nagusietako batzuk:

-Ikasle akademikoki superdotatuak sortzen ditugu eta emozionalki analfabetoak.

-Hezkuntzaren helburu nagusia zoriontsu izaten ikastea da. Hori bilatzen lagundu behar diegu haurrei ttiki-ttikitatik, bakoitzari bere moduan.

-Hezkuntzako irakaspen guztiak ikaslearen beraren kontzientziatik eginak izan behar dute. Hau da, ikasketak esanguratsua izan behar du.

-Denok dugu ezberdinak izateko eskubidea, eta aukeratzeko eta garatzeko aukera berberak izan behar ditugu.

-Irakastea ez da ezagutzak transferitzea, baizik eta ikasketa sortzeko edo eraikitzeko ahaltasunak sortzen jakitea.

-Irakasle eta ikasleak elkarrekin ikasi behar dute, irakatsi, kezkatu, emozionatu, eta elkarrekin egin behar diote aintzin eragozpenei. Irakasleak ere etengabeko ikaslea izan behar du.

Ideia batzuk bertzerik ez dira. Agian aldatuko ditugu, seguruik osatu ere bai... momentuz manifestura egin dugun lehenbiziko hurbilpena da. Oraindik formatuaren ideiarik ez dugu. Poliki-poliki joanen gara garatzen.

Klasera kasik egunero etortzea pentsatu dugu. Bihar ortzirala etorriko gara, astelehenetan ere bai... hagitz motibatuta gaude eta behar diren ordu guztiak sartuko ditugu lan txukuna egiteko.

Murala pentsatzen ere hasi gara. Hagitz ideia ona izan dugu baina momentuz ez dut horren inguruko deus idatziko. Sorpresa izanen da. Hori bai, batez ere irri eginen dugu!

Erlojupeko lana hasi da!

3, 2, 1.. ya!

Josemik erran digunez, Aste Santua baino lehen egin behar ditugu manifestuak eta murala. Talde handia garenez, bitan banatuta eginen dugu lan hemendik antzinera. Bi manifestu eginen ditugu, talde ttiki bakoitzak bat, eta murala guztion artean egiten saiatuko gara (denboarik baldin badugu behinik behin).

Horretarako, astelehen goizetan ere klasera etorriko gara. Josemik ordutegia zabaltzeko aukera eskaini digu, ordenagailu-gela ikasgaiaz aparteko orduetan irekitzeko aukera emanez. Aprobetxatu eginen dugu eta astean hiru egunez etorriko gara klasera hemendik antzinera.

Lan haundia egin behar da. Erlojupeko lana izanen da. Hiru aste bakarrik gelditzen dira Aste Santua baino lehen eta ez dakigu denborarik izanen dugun dena akabatzeko.

Gainera, sormen-lanak ez dira lan automatiko, mekaniko eta ortopedikoak. Hausnartzea, pentsatzea eta sortzea eskatzen dute eta ez da lan erraza. Emaitza ona izatea ez da erraza. Pertsonalki aunitz motibatzen nau, baina martxan paratu beharko gara gaurtik!

Kasualidadez Estitxurekin egon gara, iazko plastikako irakaslearekin, eta sekulako motibazioa agertu du maiatzeko erakusketa egiteko. Gu ere motibatu gaitu eta niri, pertsonalki, oraindik gogo handiagoa eman dit erakusketa horretarako lan txukunak egiteko. Ahalik eta manifesturik politenak egiten saiatuko gara. Baita murala ere!

Iazko esperientzia ona ikusita, ea bertze horrenbertze egiten dugun aurten!

Irakaslearekin tutoretza, antzinera egiteko bulkada

Joan den astean Josemi Correa irakasleak bere tutoretza ordura joateko gonbitea egin zigun. Ez genekien ongi zertarako baina hortxe agrtu gara gaur taldekide guztiak goizeko 11:30tarako bere bulegora.

Talde-lana zer gisa joaki zaigun azaldu diogu; izan ditugun zailtasunak, antolatzeko modua, zer eta nola egin dugun orain artekoa... eta, momentuz, franko ongi goazela eman digu aditzera.


"Motibazio handia duzue, karrerako azkeneko hilabeteetan zaudete eta aprobetxatu duzuen guztia emateko eta irakasgai honekin gozatzeko". Bulkada haundia izan da hitz horiek aditzea. Aunitz animatu gaitu talde bezala.

"Erabili sormena, zuek ikusi nola egin erakusketarako lanak, bai manifestua, bai murala. Zuek ikusi zer egin nahi duzuen ere, bi lanak, bat... librea da. Zuek karrerako hiru urteotan ikusi eta ikasi duzuena azalduko duen artelan bat sortzea nahi dut", azaldu digu irakasleak. Gustatu zait aurkezpena, gogo haundia dudalako hiru urte hauetan izan ditudan gogoeta pertsonalak eta hezkuntzari buruzko hausnarketak artelan baten bidez adierazteko.

Motibatzen nau egitasmoak. Iaz plastikan hagitz gustura egin nuen lan eta hemen ere lan kreatibo, desberdin eta aberatsa egiten ahal dugula seguru nago. Bulkada haundia izan da zentzu horretan ere. Motibatzen nau lan egiteko sistema honek.

Sei lagun gara taldean eta, aitzinetik ere aipatu dudan bezala, koordinazio-lana ez da erraza. Bortz eskola desberdinetako informazio jaso dugu, hori ordenatu, konparaketak egin, taulak osatu... ez da lan erraza izaten ari.

Gaur gelan gogor aritu gara lanean baina oraindik ez dugu lana akabatu. Gure artean lana antolatzen pasatu dugu denbora gehien. Ez da erraxa. Harreman ona dugu, ongi ezagutzen dugu elkar, baina gisa honetako talde-lanak dedikazio eta antolakuntza handia eskatzen du. Konpondu gara eta lana martxan dugu. Espero dugu aste honetan akabatzea.

Klasekideekin elkarlanean

Josemik proposatutakoa segituz, gaur klaseko bertze talde batekin harremanetan paratu gara gure lanen balorazioa egiteko; haiek gure lanarena eta guk haienarena. Esperientzia polita izan da.

Hauek izan dira bertze taldekideak: Ainhara Plazaola, Nerea Corral, Ainhoa Landa, Leire Zaldivia eta Ainhoa Zaldivia (argazkian guztiak ageri dira, Ainhoa Landa izan ezik). Beraien lana honako ikastetxeetan burutu dute: Irungo El Pilarren, Donostiako Axular Lizeoan eta Manuel de Larramendin eta Tolosako Laskorain Ikastolan.

Hagitz lan ona egin dute. Harrituta utzi gaituzte. Gu oraindik informazio-bilketan gaude baina beraiek kasik akabatua dute lana. Aurkezpen erakargarria egin dute; tapa, aurkibidea, kolore aunitz... eta edukia ere hagitz osatua prestatu dute; taulak, konparazioak, ikastetxeen aurkezpenak, beraien aurrezagutzak... aunitz gustatu zaigu beraien lana. Komentario batzuk egin dizkiegu eta hobetzeko proposamen batzuk ematera ere ausartu gara. Hala ere, lan ederra egin dute eta ezin izan dugu gauza aunitz gehiago gehitu.

Gu poliki goaz. Sei taldekide gara eta gure arteko koordinazio-lanak zailak dira. Ikastetxe guztietara joan eta informazioa biltzea ez zaigu erraza egiten ari. Espero dugu hurrengo asterako lana aintzintua izatea.

Taldeko bloga sortu dugu!

http://gometxeroak.blogspot.com/

Horixe da. Egin klik eta kuxkuxeatu!

Bakoitzak bere gloga izateaz gain, taldeko bloga sortzea pentsatu dugu. Ez da beharrezkoa irakasleak erran digunez. Baina teknologia berrien munduan murgiltzeko gogo haundia dugunez, norberaren egunkari pertsonala izateaz gain, talde bezala ere gure txokoa izatea erabaki dugu. Hortaz, Nereak, Ikerrek, Jexuxek, Anderrek eta nik gure hausnarketa, iritzi, irudi, bideo, etab.ak hortxe zintzilikatuko ditugu.

Gainera, taldekide berri bat izanen dugu lehenbiziko lana, IKTen konparaketarena, egiteko: Eneritz Mitxelena. Oiartzunen egin ditu berak praktikak eta hango eskolako IKTen informazioa ere gehituko diogu gure lanari. Ongi etorri, Eneritz!

Lan txukuna geldituko zaigu inondik ere. Leitza, Orio, Oiartzun, Legazpi eta Hernaniko eskoletako informazio osatuarekin txosten ederra prestatzen ari gara. Hurrengo posteoan izanen duzue emaitzaren berri.

Langile Ikastolara buelta

Lehenbiziko lana egiteko, eskoletako IKTen konparaketa, practicum IIa egin nuen ikastolara bueltatu naiz, Hernaniko Langile Ikastolara.

Elena Urruzolarekin egon naiz, irakasle eta koordinatzailearekin, galdeketa bat egiten. Gustu handiz hartu nau eta solasaldi goxoa izan dugu. Bortz urteko umeen irakaslea da Elena eta berarekin egin nuen praktikaldia. Polita izan da buelta.

Langile Ikastolako Haur Hezkuntzan informazio eta komunikazio teknologiak zer gisakoak diren azaldu dit. Gauza batzuk atentzioa eman didate eta lerrootara ekarri nahi izan ditut.

Adibidez, Langile Ikastolan teknologia berriekiko interesa izan badutela adierazi dit Elenak baina erran dit Langile ez dagoela ez IKTn, ez Eskola 2.0-ren barrenean. "Kritiko samar agertu ginen hasieratik proiektu horiekin, eskolako baliabideak, ordutegiak, etab. ez zigutelako aukerarik ematen proiektu horietan sartzeko. Jende asko eskatzen zuten saioetara joateko eta ez genuen mediorik", azaldu dit. Argitu du IKTen inguruko hausnarketa sakona egin nahi dutela Langilen baina oraindik ez direla horretan jarri.

Guk unibertsitateko taldean izandako eztabaida Elenari berari helarazi diot eta Haur Hezkuntzan Teknologia berriak sartzea beharrezkoa ikusten duen galdetu diot.

Honakoa erantzun dit: "Ez da beharrezkoa baina ez diot pegarik ikusten, onuragarria da. Alde batetik, informatikara hurbiltzeko balio du. Gehienek etxean ordenadorea badute eta oso erraz ibiltzen dute. Ez dakienak erraz ikasten du gelan. CDroomak oso egokiak dira eta umeei asko gustatzen zaizkie".

Hortaz, ordenadorea izatearen aldeko apustua egiten du Elenak. Hala ere, "zerbait osagarria" da beretzat. Gelan IKTekin ez dutela lan berezirik egiten erran dit. "Binaka jartzen ditugu ordenadoreetan, elkarri lagunduz lan egiteko. Baina garrantzitsuagoa da bi ume horiek elkarren artean nola moldatzen diren (elkarri laguntzen dioten, elkarlanean funtzionaten duten, etab.) ordenadorea bera erabiltzen ikastea baino. Egia da asko motibatzen direla jokuekin, irudiekin... bana ez da beharrezkoa ordenadorea erabiltzen jakitea. Zerbait osagarria da", nabarmendu du Elenak.


Gustatu zait bere hausnarketa eta gure lanerako baliagarria izan daitekeelakoan nago. 30 urte daramatza Elenak Langilen lanean eta hezkuntzaz aunitz daki. Bere hitza bada zerbait.

Nire informazio-bilketa gelara ekarri dut eta bertze eskoletako informazioarekin osatzea falta da orain.

Horretarako, "Google docs" erabiliko dugu. Nire galdeketa goitu dut eta bakoitzak bere erantzunak dokumentu berean emanen ditu. Horrela, galdeketa bera eskola guztietako informazioarekin erantzunen dugu.

Hurrengo posteoan goituko dugu lan osatua.

PD: Blog honetan ikusiko dituzun umeen argazki guztiak internetetik hartutako argazkiak dira. Adin txikikoen irudi-eskubideak tarteko, ez dut nire inguruko umeen argazkirik goituko.

Lehenbiziko pausuak, lehenbiziko eztabaidak

Kostata, baina paratu gara martxan. Anderrek eta biok hasi genuen bidea bertze hiru lagunekin segituko dugu. Hauxe da osatu dugun taldea:

-Iker Urkiola
-Nerea Ugarte
-Jexux Buldain
-Ander Errasti
-Joseba Olagarai

Horiexek arituko gara IKTen esperientzien analisia egiten. Hortaz, ailegatu da momentua teknologia berriei eskua eman eta martxan hasteko.


Bakoitzak bere bloga sortuko du eta taldeko bloga ere eginen dugu. Taldeko blogean lan osatuak, hausnarketa konpartituak eta taldeko esperientziak idatziko ditugu. Norberarenean berriz, bakoitzak eginen du ikasgaiaren jarraipena egunkari formatuan.

Hasteko, bigarren klasean, Josemi Correak IKTen lana nola egin azaldu duenean, proiektua planifikatzen hasi gara. Lau eskoletan burutuko dugu lana: Leitzako Erleta Eskolan (Iker eta Jexuxek praktikak egin dituzte han), Legazpiko Domingo Aguirren (Nereak), Orioko Herri Ikastolan (Anderrek) eta Hernaniko Langile Ikastolan (nik, Joseba Olagaraik).

Helburua gaur egun IKTak (informazio eta komunikazio teknologiak) Haur Hezkuntzan duten eragina eta erabilera aztertzea da. Galdeketa bat prestatu dugu bakoitzak bere ikastetxean egin dezan, informazioa lortzeko. Gero, komunean paratuko dugu bakoitzak jasotakoa eta lanarekin hasiko gara.

Lehenbiziko eztabaida sortu da taldean: beharrezkoa da teknologia berriak Haur Hezkuntzan lantzea?

Batzuk baietz zioten eta bertze batzuk ezetz. Umeak ordenagailua erabiltzen hastearekin ados daudenen ustez, garrantzitsua da ttiki-ttikitatik ordenadorearekin trebatzea, teknologia berriekiko gaitasunak indartzen dituztelakoz eta gerora sortu daitezkeen erronkei aintzin egiteko gaitasun eraginkorra lortzen dutelakoz.



Nire ustez berriz, lehentasun kontua da. Ez dut uste ordenadoreen erabilera txarra edo desegokia denik, baina Haur Hezkuntzako adin horietan bertze alderdi batzuei lehentasuna ematea egokiago ikusten dut, bertzeak bertze, alderdi sozialari edo emozionalari. Niretzat puzleak ordenadorean egitea baino interesgarriagoa da taldean edo binaka egitea, jokuarekin berarekin ikasi dezaketenaz gain, harremanetan ere aunitz trebatu daitezkeelako.

Nago gaur-egungo gizartean lehenago edo beranduago, ordenadorea erabiltzen ikasiko dutela eta hiru, lau edo bortz urte goizegi iruditzen zait horretan hasteko. Ez dago sobran, baina bertze alderdi batzuk lantzen apostu handiagoa eginen nuke nik, teknologia berriak lantzen baino.

Nik unibertsitatean izan nuen lehenbiziko kontaktua teknologia berri aunitzekin eta arazorik gabe bizi naiz gaur-egungo gizartean. Ez dut faltan bota ume-umetan ez landu izana. Lehen Hezkuntzan lantzen hasteko egokiagoa iruditzen zait, Haur Hezkuntzan baino.

Poliki-poliki garatuko ditugu gure aurriritzi hauek eta osatuko ditugu informazioa osatzen joan ahala. Hala ere, eztabaidak sortzea eta horretaz hausnartzea hagitz aberasgarria da eta lehenbiziko egunetik ongi hasi garela uste dut.

Interes handia dut ikasgai honekiko. Taldelanean jarduteak aunitz motibatzen nau eta gaia bera ere hagitz interesgarria egiten zait. Irakasle lanerako baliagarria izanen zaigulakoa nago. Beldur pixko bat ematen dit, gauza berri dexente ikasi beharko ditugulako, baina seguru aberasgarria izanen dela.